Landsmót skáta er að jafnaði haldið á þriggja ára fresti. Á mótið koma skátar frá Íslandi en jafnframt er erlendum skátum boðið á mótið. Þátttakendur eru á aldrinum 10-17 ára og sjálfboðaliðar 18 ára og eldri. 

Á Landsmóti skáta skapast ævintýraheimur þar sem hvert félag byggir upp tjaldbúð þar sem skátarnir búa í vikutíma. Það reynir á skátana og mörg fara út fyrir þægindarammann sinn þegar þau fara í fyrsta sinn á skátamót og dvelja í tjaldi með öðrum.

Skátarnir fá tækifæri til að kynnast ólíkum einstaklingum og mynda ný vinatengsl. Skátamót eru ein af lykilstoðum skátastarfs því þar gefst okkur kostur á að efla leiðtogahæfni og skapandi huga. Úti í náttúrunni getur skátinn fundið tengingu við umhverfið og eigin tilveru. Við tökumst á við krefjandi áskoranir sem styrkja sjálfstraust, ábyrgð og þekkingu okkar. 

Dagskráin verður fjölbreytt og ævintýraleg en meðal annars verður boðið upp á leiki, hike, bæjarferðir, þrautir, kvöldvökur og næturleiki ásamt mörgu öðru.